غرفة أولادك

أنا جايبة لكم فى العدد ده موضوع حلو قوى ان شاء الله تستفيدوا منه 
غرفة أولادك ؛ طبعا أكتر غرفة بتتعبك فى التنظيم هى غرفة الاولاد ودى بعض النصائح اللى هتفيدك فى الموضوع ده:

• أولا :- من البداية خالص وانتى بتشترى أثاث بيتك لازم تعملى حساب للغرفة دى طب هتقولوا الشقة صغيرة إزاى نعمل حساب الغرفة دى أولا فى أثاث ممكن تجبيه فى أول جوازك تستفيدى بيه بعد كدة فى غرفة الطفل ذى مثلا كنبة بها أدراج للتخزين من أسفل أو مثلا كنبة بالنهار وفى الليل تبقى سرير إختارى أثاث حجمه صغير عشان بعد كده تقدرى توفرى مكان لغرفة الاولاد 
• ثانيا :- نقول ربنا كرمنا وقدرنا نعمل غرفة للأولاد  أولا مش هوصيكى بإن تكون الوانها وتصميمها ( طبعا متخيلة إنى هقول تكون الوان مرحة وتناسب طفلك ومبهجة ذى أى حد بيكلم فى الموضوع ده ) لاء انا هقولك خير الامور الوسط فى ناس بتجيب الغرفة تكون مناسبة للطفل فى سنوات عمره الاولى طب وبعدين لما يكبر بعد كام سنة أرمى كل ده وأجيب غيره حرام طبعا ولا أسيبها ذى ماهى وإبنى يبقى عندة 20 سنة ونايم فى أوضة بيبى يبقى الحل إيه ؟ الحل إنك تكون الغرفة مناسبة لجيع مراحل عمر إبنك وخدى بالك البهجة والفرحة اللى ناس بتتكلم عنها دى مش ضرورى تكون فى تصميم الغرفة وألوانها ممكن قوى تكون بلعبة حلوة تلعبيها مع ولادك ،بجو الحب الى مالى البيت ،بالالعاب الى بتشتريها عشانه .
• ثالثا :- بعد ما عملنا الاوضة لازم نستغل كل حته فيها (بس من غير ما نخنق الولاد ) إزاى ؟ مين فينا مش بيضايق من العواميد الى فى البيت جربتى تستغلى العواميد دى وتعملى نظام (buld -in) بين كل عامودين أمام بعضهم إعملى أرفف وحطى فيها متعلقات طفلك ؛ حاجة تانية لما تشترى له مكتب لمذاكرته هاتيه من النوع الى بيتقفل عشان بعد ما يخلص مذاكرته يقدر يطويه ويلعب مكانه ؛كمان هاتى خزانه لتخزين لعب أطفالك بدل ما تبقى فى كل مكان بالبيت، وتقدرى تجيبى صناديق بسيطة فى شكلها وسعرها كمان وإنتى تجمليها بالقماش الملون مثلا بأوراق الكوريشه مثلا.......... يعنى الافكار الحلوة كتيييييييير وأكيد هتبقى أحلى لما تحطى عليها لمستك إنتى 

أنا كده خلصت كلامى ياريت الى تشوف الموضوع ده تقول لمستها ايه ؛يعنى..... عشان كلنا نستفيد